Saturday, 31 August 2013

கறுப்பு நதி::

கறுப்பு நதி

¤


கறுப்பு நதி பற்றி

நீங்கள் கேள்விப்பட்டிருக்க

மாட்டீர்கள்

ஆனால் பார்த்திருப்பீர்கள்..


அதர்ம பூமியை

இருப்பிடமாகக்

கொண்டிருக்கும்

எனது சமூகத்தின்

பிறப்பிடம்

இங்கிருந்துதான்

ஆரம்பமாகிறது!


சாதிச் சாக்கடையில் சறுக்கி

கரன்சிக் கால்வாயில் கலக்கும்

அப்பெருநதியினைப்

பருகிப் பருகியே

உயிர் வாழ்ந்து

கொண்டிருக்கிறது

பிரபஞ்சப் பிணங்கள்!


இந்நதியில் ஒரு துளி ருசித்துவிட்டால்

போதும்..

காதல் காமமாகும்..

காமம் காசாகும்..


கேட்கவே காது கூசுகிறது...

இருப்பினும் என்ன செய்ய?


தர்மபூமியில் பிறந்த நீங்களும்

என்னைப் போலவே ஒரு

வெள்ளை நதியைத்

தேடித்தேடிக் களைத்துப்போய்

கடைசியில் இந்தக்

கறுப்புநதியில்

கால் நனைக்கத்தான்

போகிறீர்கள்!


எனது

" சாத்தானின்

டைரிக் குறிப்புகள் "

கவிதைத் தொகுப்பிலிருந்து...


Published with Blogger-droid v2.0.4

Monday, 29 July 2013

மகளாதிக்கம் 13

மகளாதிக்கம்....13 



அம்மா சொல்லும்

எல்லாக் கதைகளிலும்

ஏதாவதொரு தேவதை

இருக்கிறாள்..

அம்மாவுக்கு ஒரு மகள்

இருந்திருந்தால்

எந்தக் கதையிலும்

தேவதை

இருந்திருக்கமாட்டாள்!



Published with Blogger-droid v2.0.4

Tuesday, 23 July 2013

மகளாதிக்கம் 12

மகளாதிக்கம்....12 



வைத்தது வைத்த இடத்தில்

இருப்பதில்லை..

எடுத்ததை எடுத்த இடத்தில்

வைப்பதில்லை

என்னும் அழகியல் கோட்பாட்டோடு

இருக்கிறது

மகளாதிக்கம் நிரம்பிய வீடு!



Published with Blogger-droid v2.0.4

Saturday, 20 July 2013

மகளாதிக்கம் 11

மகளாதிக்கம்....11 



மௌனத்தாலும்

புன்னகையாலும்

வாழும் கலையை

உணர்த்திக் கொண்டே

இருப்பதற்காவது

மகள் இன்னும்

கொஞ்ச காலம்

சிறுமியாகவே இருக்கலாம்!!



Published with Blogger-droid v2.0.4

Wednesday, 17 July 2013

மகளாதிக்கம் 10

மகளாதிக்கம்....10 



கண்திறந்த

சிலையின் முன்னால்

கண்மூடி கைகூப்பி

நிற்கிறாள் மகள்..

தவமின்றி

கடவுளுக்குக் கிடைத்தது

தேவதை தரிசனம்!



Published with Blogger-droid v2.0.4

மகளாதிக்கம் 9

மகளாதிக்கம்....9 



மகள் இருக்கின்ற

நம்பிக்கையில்தான்

எந்த அப்பாவும்

தேவதையை

நம்புவதில்லை!!



Published with Blogger-droid v2.0.4

Tuesday, 16 July 2013

மகளாதிக்கம் 8

மகளாதிக்கம்....8 



புத்தகத்தின் நடுவே

வைத்திருக்கும்

மயிலிறகை

மகளுக்குத் தெரியாமல்

சிறிது சிறிதாய்க் கிள்ளி

குட்டி போடவைக்கையில்

தொடங்குகிறது

மகளின்  எதிர்பார்ப்புகளை

பூர்த்தியாக்கும்

அப்பாக்களின்

வாழ்க்கைப்பயணம்!



Published with Blogger-droid v2.0.4

மகளாதிக்கம் 7

மகளாதிக்கம்....7 



நல்லவேளை

மகள் பிறந்தாள்..

இல்லையென்றால்

தேவதைக்கு தந்தையாகும்

வாய்ப்பு எனக்கு

கிடைக்காமலே போயிருக்கும்!



Published with Blogger-droid v2.0.4

Monday, 15 July 2013

மகளாதிக்கம் 6

மகளாதிக்கம்....6 



மகள்களைப் பெற்ற

அப்பாக்களைப் போலவே

அக்காவையோ

தங்கையையோ

சகோதரியாய் பெற்ற

மகன்களும்

பாக்கியவான்களே!



Published with Blogger-droid v2.0.4

Sunday, 14 July 2013

மகளாதிக்கம் 5

மகளாதிக்கம்....5 



வள்ளுவனுக்கும்

வாசுகிக்கும்

மகள் பிறந்திருந்தால்

ஐந்தாம் அதிகாரமாய்

தமிழுக்கு

கிடைத்திருக்கும்

மகளதிகாரம்!!



Published with Blogger-droid v2.0.4

மகளாதிக்கம் 4

மகளாதிக்கம்....4 



கண்ணாமூச்சியாட்டத்தில்

அம்மாவின் முந்தானையில்

மறைந்திருக்கும் மகளை

கண்டுபிடித்தல் சுலபம்..

மகளைப்போல்

கணநேரத்தில்

தொலைதல்தான்

மிகக் கடினம்!



Published with Blogger-droid v2.0.4

Saturday, 13 July 2013

மகளாதிக்கம் 3

மகளாதிக்கம்....3 



மழையை

ரசிப்பதற்கும்

மழையில்

நனைவதற்கும்

இடையிலான

நிகழ்வில் இருக்கிறது

எனக்கும்

மகளுக்குமான

வித்தியாசம்!



Published with Blogger-droid v2.0.4

Friday, 12 July 2013

மகளாதிக்கம் 2

மகளாதிக்கம்....2 



விரட்ட விரட்ட

வந்தமர்ந்து

உணவு தேடிய

களைப்பையெல்லாம்

மகளோடு விளையாடித்

தீர்த்துவிட்டுப்

பறக்கிறது

முற்றத்துக் காக்கையொன்று!



Published with Blogger-droid v2.0.4

Thursday, 11 July 2013

மகளாதிக்கம் 1

மகளாதிக்கம்....1 



ஈன்றெடுத்து

உலகில் உலவச் செய்தவள்

யாரோ ஒருவரின் மகள்


பொட்டல் காட்டில்

நொண்டியும்

பல்லாங்குழியும் ஆடக்

கற்றுத்தந்தவள்

யாரோ ஒருவரின் மகள்


மூன்றாம் வகுப்பில்

வாய்ப்பாட்டை

தப்பாய் ஒப்பித்து

ஐந்தாம் வகுப்பில்

அத்தனை பாடத்திலும்

முதலாய் வந்தவள்

யாரோ ஒருவரின் மகள்


காதலிக்க தூது சென்றதும்

காதலித்து கவிதை தந்ததும்

யாரோ ஒருவரின் மகள்


கட்டியணைத்து

கணவனாக்கியதும்

கடைசிவரை கூட நிற்பதும்

யாரோ ஒருவரின் மகள்


இவ்வளவையும்

மீண்டும் மறுசுழற்சி செய்ய

என்னையும்

யாரோ ஒருவராக்க

என் வீட்டில்

பிறப்பெடுக்கிறாள்

ஒரு மகள்!



Published with Blogger-droid v2.0.4

Wednesday, 10 July 2013

காதல் அந்தாதி 15

காதல் அந்தாதி....15



காதலை

கடனாய் தந்து

கவிதைகளை

வட்டியாய் வசூலிக்கும்

கவிதைக்காரி

நீ!



Published with Blogger-droid v2.0.4

Tuesday, 9 July 2013

காதல் அந்தாதி 14

காதல் அந்தாதி...14



உனக்குத் தெரியாமல்

நானும்

எனக்குத் தெரியாமல்

நீயும்

காலிக்கோப்பையில்

மிச்சமிருக்கும்

எச்சில் தேநீரை

ருசிக்கிறோம்..

புனிதமடைகிறது

காதல்!



Published with Blogger-droid v2.0.4

Monday, 8 July 2013

காதல் அந்தாதி 13

காதல் அந்தாதி....13



என்னை

சீரழித்து

சீராக்கியது அது


சரியா தவறா என

பகுத்தறியும் அறிவை

மழுக்கி

போதையூட்டியது அது


உறக்கத்தை முழுதுமாய்

உறிஞ்சிக்கொண்டு

கவிஞனென்று

கிறுக்கனாக்கியது அது


ரோஜாக்களை தினம் தினம்

கொலை செய்யத்

தூண்டியதும் அதுவே


நான் சொல்வதெல்லாம்

காதல்..

காதலைத் தவிர

வேறொன்றுமில்லை!



Published with Blogger-droid v2.0.4

காதல் அந்தாதி 12

காதல் அந்தாதி....12



நீரின்றி

மட்டுமல்ல

காதலின்றியும்

அமையாது உலகு!



Published with Blogger-droid v2.0.4

காதல் அந்தாதி 11

காதல் அந்தாதி....11



சொர்க்கம்

இருக்கிறதா இல்லையா

தெரியாது..

காதலிருக்கிறது

அது போதும்!



Published with Blogger-droid v2.0.4

Sunday, 7 July 2013

காதல் அந்தாதி 10

காதல் அந்தாதி....10



கள்ளிச் செடியில்

அவர்களின் பெயர்கள்


பேருந்து இருக்கைகளின்

பின்புறத்தில்

அவர்களின் பெயர்கள்


கோவில் சுவற்றின்

கற்பூரக் கரியில்

அவர்களின் பெயர்கள்


தேவாலய மேஜைகளில்

அவர்களின் பெயர்கள்


குட்டிச்சுவர்கள்

கழிப்பிடக் கதவுகள்

என கண்ட இடத்திலெல்லாம்

கண்டபடி

அவர்களின் பெயர்கள்


இப்போதும் சொல்கிறேன்..


எப்படிப் பார்த்தாலும்

காதல் அழகானதே!



Published with Blogger-droid v2.0.4

Saturday, 6 July 2013

காதல் அந்தாதி 9

காதல் அந்தாதி....9



அறிவியல் பாடத்தில்

சந்தேகம் கேட்பதாய்

உன்னிடம் பேசிப் பேசியே

அழகியலின் சந்தேகம்

தீர்த்துக் கொள்கிறேன்!



Published with Blogger-droid v2.0.4

காதல் அந்தாதி 8

காதல் அந்தாதி....8



அநேகமாய்

எல்லோரும்

எழுதிப்பழகிய

பொய் கலவாத

முதல் கவிதை

இதாய்த்தான் இருக்கும்..

"ஐ லவ் யூ"



Published with Blogger-droid v2.0.4

காதல் அந்தாதி 7

காதல் அந்தாதி....7



தேவதைகள்

பிறப்பதில்லை

காதலால்

உருவாக்கப்படுகிறார்கள்!



Published with Blogger-droid v2.0.4

Friday, 5 July 2013

காதல் அந்தாதி 6

காதல் அந்தாதி....6



உனக்கான

ஹைக்கூ கவிதைகளில்

நிரம்பி வழிகிறது

என் ஹைடெக் காதல்!



Published with Blogger-droid v2.0.4

காதல் அந்தாதி 5

காதல் அந்தாதி....5



எவருக்கும்

எதற்கும்

பிரயோஜனமில்லை

நீயில்லாத நானும்

காதலில்லாத உலகும்!



Published with Blogger-droid v2.0.4

Thursday, 4 July 2013

காதல் அந்தாதி 4

காதல் அந்தாதி....4



குளத்து நீரள்ளி

நீ முகம்

கழுவுகிறாய்


குளமெங்கிலும்

எழுகின்ற

நீர்வளையங்களில்

தேவதை பிம்பங்கள்!



Published with Blogger-droid v2.0.4

Wednesday, 3 July 2013

காதல் அந்தாதி 3

காதல் அந்தாதி....3



உன்னோடிருக்கையில்

உனது சொற்களையும்

தனித்திருக்கையில்

எனது மௌனங்களையும்

தின்று வளர்கிறது

காதல்!



Published with Blogger-droid v2.0.4

Tuesday, 2 July 2013

காதல் அந்தாதி 2

காதல் அந்தாதி....2




எடுத்துக்கொள்ளச்

சொல்லி

கைதூக்கி அழும்

குழந்தையைப் போலவே

உன்னிடம்

என் காதல்!


Published with Blogger-droid v2.0.4

Monday, 1 July 2013

காதல் அந்தாதி 1

காதல் அந்தாதி... 1




கொஞ்சுவதற்கும்

திட்டுவதற்கும்

அருகிலேயே

நிலா


கதை சொல்லி

தூக்கம் கலைக்க

ஒரு தேவதை


குளிர் காய்ந்து கொள்ள

மழை


இளைப்பாறிக் கொள்ள

வெய்யில்


அவ்வப்போது

எதையாவது

கிறுக்கி வைக்க

பூ முளைத்த பேனா


நொடி நொடியாய்

மரணித்து வாழ

நிரந்தர சொர்க்கம்


இதைத் தவிர

வேறென்ன வேண்டும்?


நீயும் காதலையே

தேர்ந்தெடுத்துக் கொள்!


Published with Blogger-droid v2.0.4

Sunday, 30 June 2013

மகளாகிய தேவதை 25

மகளாகிய தேவதை  25




ழகரத்தை

மிகச் சரியாய்

உச்சரிக்கும் தமிழாசிரியை..


உதட்டில்

உமிழ்நீரொழுக

ஆடியாடி நடக்கும்

பிரபஞ்ச அழகி..


டூ விட்ட அடுத்த

நொடியே பழம் விட்டு

பழயன மறக்கும்

பாசக்காரி..


மணிக்கொரு முறை

எட்டிப்பார்க்கும்

கடிகாரக் குருவிக்கு

கதை சொல்லும்

கவிதைக்காரி..


பூமியில் பறக்கும்

சிறகில்லா தேவதை..


பெண்மைக்கு

புகழ் சேர்க்கும்

மீசையில்லா பாரதி..


இப்படியும்

அப்படியும்

எப்படியும் இருக்கலாம்..


மகள் மகளாய்த்தான்

இருக்கவேண்டுமென்று

எந்த அவசியமும் இல்லை!!


Published with Blogger-droid v2.0.4

Saturday, 29 June 2013

மகளாகிய தேவதை 24

மகளாகிய தேவதை  24




பிறந்த வீட்டிலிருந்து

புகுந்தவீட்டிற்கு

போகையில்

இருண்ட வீடாகிறது

மகள்

இருந்த வீடு!


Published with Blogger-droid v2.0.4

மகளாகிய தேவதை 23

மகளாகிய தேவதை  23




முதலும் கடைசியுமாய்

கடலிடம்

பிரார்த்திக்கிறேன்..

மகள் கட்டிய

மணல்வீட்டை

அவள் விளையாடி

முடிக்கும்வரையிலாவது

அலையிடமிருந்து

காப்பற்றக்கோரி!!


Published with Blogger-droid v2.0.4

Friday, 28 June 2013

மகளாகிய தேவதை 22

மகளாகிய தேவதை  22




தேவதை என்றெல்லாம்

ஒன்று இல்லவே இல்லை..

மகள் வேண்டுமானால்

இருக்கிறாள்!!


Published with Blogger-droid v2.0.4

Thursday, 27 June 2013

மகளாகிய தேவதை 21

மகளாகிய தேவதை  21




மகள்!

இதைவிட சிறந்த

பெயரொன்றை

யாராலும்

சூட்டமுடியாது

தேவதைக்கு!!


Published with Blogger-droid v2.0.4

Wednesday, 26 June 2013

மகளாகிய தேவதை 20

மகளாகிய தேவதை  20




கேட்டுப் பெறுதலும்

இன்பமே..

'மகள் முத்தம்'


Published with Blogger-droid v2.0.4

மகளாகிய தேவதை 19

மகளாகிய தேவதை  19




அழகானதோர்

ஓட்டுவீடு..

அதைச் சுற்றி

நீண்டிருக்கும்

புல்வெளி..

வீட்டின் முன்னால்

ஒரு சிறு நதி..

நதியில் இரு

வாத்துக் குஞ்சுகள்..

ஆங்காங்கே சில

தாமரைப்பூக்கள்..

கரையோரம் சில

தென்னை மரங்கள்..

வானில் பறக்கும்

ஒற்றைப் பறவை..


படம் வரைகிறேன்

என்று சொல்லி

இன்றைக்கும்

ஒரு கவிதையைத்தான்

எழுதித் தந்திருக்கிறாள்

மகள்!


Published with Blogger-droid v2.0.4

Tuesday, 25 June 2013

மகளாகிய தேவதை 18

மகளாகிய தேவதை  18




பறக்கும் முத்தமிட்டபடி

டாட்டா சொல்லும்

மகளின் கையசைப்பிற்காக

எத்தனை முறை

வேண்டுமானாலும்

வீட்டிலிருந்து விடை பெறலாம்..


வந்ததும் வராததுமாய்

எடுத்துக் கொள்ளச் சொல்லும்

மகளின் கைதூக்கலுக்காக

எப்போதும்

வீட்டிலேயே

இருந்தும்விடலாம்!


Published with Blogger-droid v2.0.4

மகளாகிய தேவதை 17

மகளாகிய தேவதை  17




புருவம் தூக்கி

விழியுருட்டி

நாக்கு நீட்டி

மிரட்டும் மகளைக் கண்டு

பயப்படுவதாய்

நடிக்கக்

கண்மூடுகையில்

கடந்துவிடுகின்றது

கணநேரக்

கவிதையொன்று!


Published with Blogger-droid v2.0.4

Monday, 24 June 2013

மகளாகிய தேவதை 16

மகளாகிய தேவதை  16




குழந்தையாய்

மாறாதவரை

எவருக்கும்

இடமில்லை

மகள் ஓட்டும் ரயிலில்!


Published with Blogger-droid v2.0.4

Sunday, 23 June 2013

மகளாகிய தேவதை 15

மகளாகிய தேவதை  15




எங்கோ ஒரு மகள்

சிறுமியாகிறாள்


எங்கோ ஒரு மகள்

கன்னியாகிறாள்


எங்கோ ஒரு மகள்

மணமகளாகிறாள்


பிரிதலற்ற உலகம்

வேண்டி

எங்கோ ஒரு தகப்பன்

அந்திமப்பொழுதில்

அழுது கொண்டிருக்கலாம்!


Published with Blogger-droid v2.0.4

Saturday, 22 June 2013

மகளாகிய தேவதை 14

மகளாகிய தேவதை  14




எனக்காக

மகளையும்

மகளுக்காக

என்னையும்

மீட்டுத்தரும்

ஞாயிற்றுக்கிழமை

ஒன்று போதும்..

முந்தைய கிழமைகளில்

விரும்பி

சிறைபட்டுக்கொள்ள!


Published with Blogger-droid v2.0.4

Friday, 21 June 2013

மகளாகிய தேவதை 13

மகளாகிய தேவதை  13




மூளை கசக்கிப்

பிழிந்தெடுத்த சொல்லோ

மனதின் ஆழத்திலிருந்து

பிடுங்கப்பட்ட சொல்லோ

ஒப்பீட்டுச் சாயம் பூசிய

வர்ணணைச் சொல்லோ

தேவையின்றி

வெகு இயல்பான

சொற்களே

போதுமானதாயிருக்கிறது

மகளின் குறும்புகளை

குறிப்பிட்டுச் சொல்ல..


என்ன செய்ய?

குழந்தைகளின்

இயல்பு அப்படி!


Published with Blogger-droid v2.0.4

Thursday, 20 June 2013

மகளாகிய தேவதை 12

மகளாகிய தேவதை  12




ஒண்ணு..

மூணு...

பத்து...

என்றவாறு மகள் விண்மீன்களை

விரல்விட்டு

எண்ணுகின்ற

அழகிற்காகவே

நிலாவை

திருஷ்டிப் பொட்டாக்கலாம்!


Published with Blogger-droid v2.0.4

Wednesday, 19 June 2013

மகளாகிய தேவதை 11

மகளாகிய தேவதை  11




வெள்ளையடித்த

சுவர்களில்

கொள்ளையடிக்கும்

பென்சில் தீற்றல்கள்


அடுக்கி வைத்ததை

கலைத்து வைத்திருக்கும்

கலைநயம்மிக்க

மேஜைகள்


திறந்த புத்தகங்களுடன்

மூடியிருக்கும்

அலமாரிகள்


அங்குமிங்குமாய்

கழற்றிப் போட்டிருக்கும்

அழுக்கில்லா ஆடைகள்


தண்ணீர் சிந்திய

வழுக்கும் வாசற்படிகள்


கோலத்தின்மேல்

கோலம்போட

அரைகுறையாய்

பிய்த்துப்போட்டிருக்கும்

அரளிப்பூக்கள்


என

அழகியல் விதிப்படியேதான்

திகழ்கின்றது..


மகளும்

மகள்சார்ந்த வீடும்!


Published with Blogger-droid v2.0.4

Tuesday, 18 June 2013

மகளாகிய தேவதை 10

மகளாகிய தேவதை  10




மகள் இருபதைக்

கடந்து

கொண்டிருக்கிறாள்..

பூஜ்யமாகிக்

கொண்டிருக்கிறது

தகப்பனின் உலகம்!


Published with Blogger-droid v2.0.4

மகளாகிய தேவதை 9

மகளாகிய தேவதை  9




அப்பாக்கள்

அன்பிற்குரியவர்கள்

மகள்கள்

அன்பிற்கே

உரியவர்கள்!


Published with Blogger-droid v2.0.4

மகளாகிய தேவதை 8

மகளாகிய தேவதை  8




குளிப்பாட்டி

தலைசீவி

பொட்டுவைத்து

ஒற்றை நொடியில்

பொம்மைக்குத்

தாயாகிவிடுகிறாள்

மகள்!


Published with Blogger-droid v2.0.4

Monday, 17 June 2013

மகளாகிய தேவதை 7

மகளாகிய தேவதை  7




அநேகமாய்

பூமித்தாயின்

உச்சி குளிர்ந்திருக்கலாம்


பறந்து பறந்து

பட்டாம்பூச்சிகளின்

சிறகு வலித்திருக்கலாம்


திறந்திருக்கும்

முன்வாசல் கதவுகள்

நடைசாத்தப்பட்டு


எறிந்து கிடந்த

வீட்டுப் பொருட்கள்

எட்டா இடத்தில்

பத்திரமாகியிருக்கலாம்


என்ன செய்வது

ஒரு பூ மலர்வதை

இவ்வளவு இயல்பாய்

விளக்கிச் சொல்ல

முடியாதுதான்..


"மகள் நடக்கப் பழகிவிட்டாள்"


Published with Blogger-droid v2.0.4

Sunday, 16 June 2013

மகளாகிய தேவதை 6

மகளாகிய தேவதை  6




மகள்

தந்தைக்காற்றிய உதவி

மகளாய் பிறந்ததுவே!


Published with Blogger-droid v2.0.4

மகளாகிய தேவதை 5

★ ★


கடவுளுக்கு

பிடித்தமான உணவு


நீரின்றி நெருப்பின்றி

சமைத்த உணவு


இது அம்மாவுக்கு

இது அப்பாவுக்கு

இது தம்பிக்கு

என

பாசத்தைப்

பங்கிட்டு

படையலிடும் உணவு


அன்பும் அறியாமையும்

அழகாய் கலந்த உணவு


போவோர் வருவோர்க்கெல்லாம்

பஞ்சமின்றி பரிமாறும் உணவு

என,


மகள்கள் சமைக்கும்

அந்த மண்சோற்றில்தான்

எவ்வளவு எளிதாய்

ஜீரணமாகிவிடுகிறது

அப்பாக்களின்

அத்தனை பசிகளும்!


★ ★ ★


Published with Blogger-droid v2.0.4